موظف يبعث برسالة مفتوحة للسادة حاكم إقليم دارفور ووالي شمال دارفور ووزیر المالیة الإتحادی

متابعات : تي نيوز

السلام عليكم ورحمة الله وبركاته
اخاطبكم وانتم جميعاً من ابناء دافور ..
كلام بالدارجي باللهجة المحلية (فضيحة ما يمسكيكم) ما تفعلونه امام موظفي الخدمة المدنية بشمال دارفور بخصوص المرتبات هذا شي لا يرضي الله ولا رسوله.

فعلا بعد سقوط ولاية شمال دارفور وتشريد المواطنين والموظفين ؛ لم تكن هنالك ايرادات للولاية ، الحكومة الاتحادية بتدفع 60٪ من المرتبات ما قادرين يا جبريل ومناوي تدفعوا 40٪ لتكملة الرواتب.

ياتو ولاية من ولايات السودان مرتباتها زي مرتبات موظفي شمال دارفور’ مافي مقارنة’ ان المناصب لا تدوم طويلا’ الموت في والقيامة في’ انتم اذا كان قيادات عليا في الدولة تهمشو بلدكم وتدعو الآخرين بعدم التهميش كلامكم كلام الطير في الباقير.

وعليكم سداد متاخرات رواتب موظفي شمال دارفور لمدة 15شهر يعني سنة وثلاثة شهور وعندنا بدلات وعلاوات من قبل الحرب وكل هذا معلق في رقبتكم الي ان نلتقي حفاة عرايا يوم لا ينفع مال ولابنون ..
مرتبات شمال دارفور تتفاوت علي حسب الدرجات في حدود 50 و60 و30 اعلى راتب لا يتعدي 100 الف جنيه سوداني .
لمن زول يسألني يقول راتبكم في الحكومة كم ؟ الفضيحة قاعده تمسكنا؛ انتم الفضيحة لاتعني لكم شيء سبحان الله؛ نسال الله بس الفضيحة والحياء يمسكم حتي لو ما راعيتو رواتب شمال دارفور ..
الترقيات واقفة تماما اي حاجة واقفة بس الشغال عندكم وبكل فلاحة وسرعة نزول العامل لمن يصل سن 60 سنة .

من الحاجات المضحكة.. في واحد عاطل ما شغال لا في حكومة لا في اعمال حرة سألني قال لي مرتبك كم قلت ليهو 53 الف ضحك وصفق يديهو قال دي لو ادوني ليها برجعه ليهم .. لا حظ ده زول عاطل عن العمل.

رسالتي آمل باذن الله ان تصلكم وتخجلو وتستجيبوا لمطالبنا المشروعة لصرف مستحقاتنا المالية نسبة لحوجتنا ونحن نعول اسر في هذه الظروف الصعبة.

ابوعبيدة عمر خلف الله
موظف بمستشفى الفاشر التعليمي