زراعة الكركديه في السودان

متابعات : تي نيوز

     الليلة دايرين نتكلم عن محصول بجيب القرش وبيرفع الرأس وكمان شرابو بيرد الروح في الهجير وهو كركدينا السوداني السمح البيضوي في الغيط كأنه ياقوت أحمر

أقعد عافية وجيب ليك كباية شاي مكرّب واسمع كلام الزول المجرب دا عشان تطلع بأعلى إنتاجية.

🔸️مواعيد الزراعة والتربة المناسبة:
الكركدي دا ما بحب البرودة وبموت في الحتة الدافية عشان كدا أحسن وقت ترمي فيهو البذرة هو مع بداية الخريف يعني في أواخر شهر يونيو أو بداية يوليو والتربة البحبها هي التربة الرملية المخلوطة بطين أو الرملية الخفيفة زي أراضي غربنا الحبيب في كردفان ودارفور وكمان التربة الرملية في الشمالية، كمان بيمشي حالو في أي تربة تانية لو صرفها لـلموية سمح وما بتكتم

🔸️طريقة الزراعة والمسافات:
نضافة الأرض:أول حاجة لازم تنضف الحواشة حقتك دي من الحشائش القديمة وتقلب التربة قلبة سمحة
السراب والسرابة: بتسوي سرابات أو خطوط والمسافة بين الخط والتاني تكون قريب السبعين سنتيمتر
🔸️رمي البذور: في كل حفرة أو جحر بترمي ليك تلاتة لـأربعة بذرات والمسافة بين الحفرة والتانية في الخط تكون حوالي خمسين سنتيمتر وعمق الحفرة ما يفوت الاتنين سنتيمتر عشان البذرة تنفس وتطلع قوام

🔹️ خدمة المحصول والنضافة:
الشلخ والتتريب: بعد ما الزرع يقوم ويصل طول الشبر بتشيل العيدان الضعيفة وتخلي عودين بس في الحفرة الواحدة ودي بنسميها عملية الشلخ
نضافة الحشايش: الحشيش دا هو العدو الأول للكركدي في بداياتو لازم تنضف حواشتك أول بأول عشان الحشيش ما ياكل مع الكركدي في الغذاء والشراب

الري: لو زراعتك مطرية فالله كريم وبتعتمد على السحاب ولو بتروي ري صناعي الكركدي ما بحب الغرق يعني اديهو مويتو بالهداوة وبحساب خصوصاً لما يبدأ يزهر.

🔸️ الحصاد واللقيط:
الكركدي بياخد ليهو قريب الأربعة لـخمسة شهور في الأرض وبتعرفو استوى لما الزهرة الحمراء اللامعة دي تقفل وتملأ مكانها وتبدأ تنشف شوية
اللقيط باليد: بتقطع الكؤوس دي بالراحة وباليد عشان ما تتكسر
التجفيف: بتشيل الكركدي وتفرشو في ضل بارد وشايف الهوا ما تدقو الشمس الحارة شديد عشان ما يفقد لونو الأحمر الداكن السمح
التقشير: بعد ما ينشف بتفصل القشرة الحمراء من البذرة الجواها وبكدا كركديك بكون جاهز للتسويق في الأسواق المحلية أو للصادر

🔸️نصيحة أخوية ركز في نظافة المنتج بعد الحصاد من التراب والقش لأنو الكركدي النضيف بيمشي للتصدير وبجيب ليك السعر اليجبر خاطرك ويسر بالك .
💚